* కూటమితో తలపడాల్సిందేనన్న జగన్ ఆదేశాలతో...

* పులివెందులపై టిడిపి ప్రత్యేక దృష్టి...

* వై నాట్ పులివెందుల అంటూ జగన్ ను ఇరుకున పెట్టే ప్రయత్నాల్లో టిడిపి...

కడప. : 

ఏపీలో స్థానిక సంస్థల ఎన్నికల వేడి క్రమంగా పెరుగుతోంది. ప్రత్యేకించి వైఎస్ జగన్ సొంత జిల్లాలో మరింత హీట్ పెరిగింది. ప్రభుత్వం ఎన్నికల నిర్వహణకు సంబంధించిన ఏర్పాట్లపై దృష్టి పెడుతుండగా, ప్రధాన రాజకీయ పార్టీలు మాత్రం గ్రామస్థాయిలో తమ వ్యూహాలకు పదును పెడుతున్నాయి. అధికార కూటమిలో భాగమైన టీడీపీ (TDP), జనసేన (Jana Sena) తమకు ఉన్న ప్రభుత్వ అనుకూలతను ఎన్నికల్లో ఓట్లుగా మలుచుకోవాలని భావిస్తుండగా, వైసీపీ (YSR Congress Party) మాత్రం ఎట్టి పరిస్థితుల్లోనూ వెనక్కి తగ్గకూడదనే నిర్ణయంతో ముందుకు సాగుతున్నట్లు రాజకీయ వర్గాల్లో చర్చ జరుగుతోంది. ఇదే విషయాన్ని పార్టీ నాయకుల సమావేశంలోను కుండబద్దలు కొట్టినట్లు చెప్పడం తెలిసిందే.

స్థానిక ఎన్నికల్లో ఏకగ్రీవాల అంశం ఇప్పుడు ప్రధాన రాజకీయ అస్త్రంగా మారుతున్నట్లు కనిపిస్తోంది. గ్రామాల్లో పోటీ లేకుండా ఎన్నికలు జరిగితే అది పార్టీ బలానికి సంకేతంగా ప్రచారం చేసుకునే అవకాశం ఉంటుంది. దీంతో వైసీపీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డి (Y. S. Jagan Mohan Reddy) తమ పార్టీ నేతలకు స్పష్టమైన దిశానిర్దేశం చేసినట్లు తెలుస్తోంది. రాష్ట్రంలో ఎక్కడా ప్రత్యర్థులకు ఏకగ్రీవ అవకాశం ఇవ్వకుండా క్షేత్రస్థాయిలో పోరాడాలని ఆయన సూచించినట్లు సమాచారం. ఒకవేళ పార్టీకి చెందిన ప్రాంతాల్లో ఏకగ్రీవ ఎన్నికలు జరిగితే సంబంధిత నియోజకవర్గ ఇన్‌చార్జిల పనితీరుపై ప్రశ్నలు తలెత్తుతాయని, భవిష్యత్‌లో వారికి పార్టీ అవకాశాలు కూడా ప్రభావితమయ్యే అవకాశం ఉందని హెచ్చరించారు.

అయితే ఈ వ్యాఖ్యలను టీడీపీ సైతం రాజకీయ సవాల్‌గా తీసుకున్నట్లు తెలుస్తోంది. ముఖ్యంగా జగన్ సొంత నియోజకవర్గమైన పులివెందుల (Pulivendula)పై కూటమి నేతలు ప్రత్యేక దృష్టి పెట్టినట్లు సమాచారం. అక్కడ స్థానిక సంస్థల ఎన్నికల్లో తమ ఆధిపత్యాన్ని చూపించాలనే లక్ష్యంతో టీడీపీ నియోజకవర్గ ఇన్‌చార్జి బీటెక్ రవి (B. Tech Ravi) ఇప్పటికే స్థానిక నాయకులతో చర్చలు ప్రారంభించినట్లు రాజకీయ వర్గాలు చెబుతున్నాయి. వైసీపీ అధినేత స్వస్థలంలోనే ఏకగ్రీవాలు జరిగితే, ఆయన ఇచ్చిన ఆదేశాల ప్రభావం ఎలా ఉంటుందనే అంశం ఆసక్తికరంగా మారింది.

పులివెందుల కోసం ప్రత్యేకంగా రాష్ట్రస్థాయి నేతలతో కూడిన బృందాన్ని రంగంలోకి దించే ఆలోచన కూడా ఉన్నట్లు సమాచారం. బీటెక్ రవితో పాటు ఎమ్మెల్సీ రాంగోపాల్ రెడ్డి (Rambhupal Reddy), బీజేపీ (BJP) ఎమ్మెల్యే ఆదినారాయణరెడ్డి (Adinarayana Reddy)కి బాధ్యతలు అప్పగించినట్లు తెలుస్తోంది. నియోజకవర్గంలోని ఆరు మండలాల్లో పార్టీ బలాన్ని అంచనా వేసి, అనుకూల ప్రాంతాల్లో ఏకగ్రీవాల కోసం ప్రయత్నించాలనే వ్యూహం ఉన్నట్లు చెబుతున్నారు.

గతంలో జరిగిన పులివెందుల జడ్పీటీసీ ఉపఎన్నిక ఫలితాన్ని కూడా టీడీపీ నేతలు ప్రస్తావిస్తున్నారు. ఆ ఎన్నికల్లో బీటెక్ రవి భార్య విజయం సాధించడం, వైసీపీ అభ్యర్థి డిపాజిట్ కోల్పోవడం తమకు అనుకూల పరిస్థితులకు నిదర్శనమని భావిస్తున్నట్లు తెలుస్తోంది. అయితే వైసీపీ కూడా పులివెందులలో తమ సంస్థాగత బలాన్ని నిలబెట్టుకునేందుకు గ్రామాల వారీగా ప్రణాళికలు రూపొందిస్తున్నట్లు సమాచారం. ఎంపీ వైఎస్ అవినాశ్ రెడ్డి (Y. S. Avinash Reddy) నాయకత్వంలో పార్టీ శ్రేణులు స్థానికంగా సమన్వయం చేసుకుంటున్నట్లు చెబుతున్నారు. దీంతో జగన్ ఇచ్చిన ఆదేశాలు ఇప్పుడు పులివెందులలో టీడీపీకి కొత్త రాజకీయ టార్గెట్‌గా మారాయా, లేక వైసీపీ తన పట్టును నిలబెట్టుకుంటుందా అన్నది స్థానిక ఎన్నికల వేళ ఆసక్తికరంగా మారింది.