• ప్రభుత్వానికి లేఖ రాసిన స్పందన లేకపోవడంతో...
• హైకోర్టులో పిటిషన్ వేసిన మేయర్ సురేష్ పాకా ...

కడప  : 

కడప నగరపాలక సంస్థ కు హక్కుగా రావాల్సిన నిధులు ప్రభుతం నుంచి రాకపోవడంతో  న్యాయపోరాటానికి శ్రీకారం చుట్టారు మేయర్ పాకా సురేష్. నగర పాలక సంస్థకు రావాల్సిన పెండింగ్ స్టాంపు డ్యూటీ వాటా, AMRUT నిధులు, BPS & LRS, భవన నిర్మాణ ప్రణాళిక రుసుముల మొత్తాల విడుదల కోరుతూ; అలాగే CLAP రుసుముల మినహాయింపు కారణంగా ఏర్పడిన ఆర్థిక లోటుకు ఆర్థిక సహాయం కోరుతూ విజ్ఞప్తి ఇది వరకే ప్రభుత్వానికి విన్నవించారు. అయినా ప్రభుత్వం నుంచి స్పందన రాకపోవడంతో ఇప్పుడు న్యాయ పోరాటం తప్పలేదు. 

వైసీపీ ప్రభుత్వం మారిన అనంతరం గడచిన రెండేళ్లుగా కడప నగర పాలక సంస్థ ప్రస్తుతం  తీవ్రమైన ఆర్థిక ఇబ్బందులను ఎదుర్కొంటోంది. ఈ ఆర్థిక సంక్షోభంలో కురుకుపోయిన నగర పాలక సంస్థ  పౌర పరిపాలన నిర్వహణ, ప్రజలకు అత్యవసర సేవలను అందించడంలో తీవ్ర ఇక్కట్లు ఎదుర్కొంటొంది. నగర పాలక సంస్థలో కనీస అవసరాలకు ఇబ్బందులు పడాల్సిన పరిస్ధితి. 

వాస్తవానికి ఆమోదించబడిన ఆర్థిక అంచనాల ప్రకారం, నగర పాలక సంస్థ తన స్టాంపు డ్యూటీ వాటా కింద నెలకు సుమారు రూ. 1,50,00,000/- (రూపాయి కోటి యాభై లక్షలు మాత్రమే) పొందే హక్కును కలిగి ఉంది. సుమారు 36 నెలల కాలానికి గాను, రావాల్సిన మొత్తం సుమారు రూ. 54,00,00,000/- ( యాభై నాలుగు కోట్లు ) ఉంది. ఈ మొత్తం కడప జిల్లా రిజిస్ట్రార్ కార్యాలయం నుండి ఇంకా అందాల్సి ఉంది. ఈ భారీ స్టాంపు డ్యూటీ మొత్తం అందకపోవడం కడప నగర పాలక సంస్థ యొక్క ఆర్థిక స్థితిని తీవ్రంగా దెబ్బతీసింది. నిధుల తీవ్ర కొరత కారణంగా, అత్యవసరమైన , తప్పనిసరి వ్యయాలను భరించడం అత్యంత కష్టసాధ్యంగా మారింది. స్టాంపు డ్యూటీ వాటా అందడంలో జరుగుతున్న ఈ నిరంతర జాప్యం సంస్థపై ఎడతెగని ఆర్థిక ఒత్తిడిని కలిగిస్తోంది. ఇది పౌర పరిపాలన సజావుగా సాగడంపై, పౌరులకు ప్రాథమిక సేవలను అందించడంపై ప్రతికూల ప్రభావం చూపే అవకాశం ఉంది.

AMRUT నీటి సరఫరా పథకానికి  ఆర్ధిక కష్టాలు :

అమృత్ పథకం కింద  రూ. 43,92,00,000 మంజూరైతే... ఇప్పటి వరకు రూ. 25,93,00,000 మాత్రమే విడుదలైంది.  ఇంకా రూ. 17,99,00,000 ల బకాయి రావాల్సి ఉంది.  మంజూరైన మొత్తంలో అధిక భాగం ఇప్పటికే విడుదలైనప్పటికీ, రూ. 17.99 కోట్ల బకాయి మొత్తం మాత్రం ఇంకా పెండింగ్‌లో ఉంది. ఈ నిధులు విడుదల కాకపోవడం వల్ల, ప్రస్తుతం కొనసాగుతున్న 'AMRUT' నీటి సరఫరా పనులకు సంబంధించిన ఖర్చులను (కాంట్రాక్టర్లకు చెల్లింపులు, సామాగ్రి కొనుగోలు మరియు అనుబంధ మౌలిక సదుపాయాల కల్పనతో సహా) భరించడంలో తీవ్రమైన ఆర్థిక ఇబ్బందులు నగర పాలక సంస్థకు ఎదురవుతున్నాయి. నిధుల కొరత కారణంగా, AMRUT నీటి సరఫరా పనుల పురోగతి ప్రతికూలంగా ప్రభావితమయ్యే అవకాశం ఉంది. తద్వారా ఈ పథకం యొక్క ప్రధాన లక్ష్యాలైన కడప నగర నివాసితులకు సరిపడా,  నిరంతర నీటి సరఫరాను అందించడంలో జాప్యం ఏర్పడే ప్రమాదం ఉంది.

అంతేకాకుండా, కడప నగరపాలక సంస్థకు (Municipal Corporation) సంబంధించిన BPS & LRS నిధులు మరియు భవన నిర్మాణ ప్రణాళిక రుసుములు (Building Plan Fees) కూడా ప్రభుత్వం నుండి విడుదల కావాల్సి ఉంది. ఇది నగరపాలక సంస్థ యొక్క ఆర్థిక ఇబ్బందులను మరింత తీవ్రతరం చేసింది. వీటికి అదనంగా, ప్రభుత్వ  ఆదేశాల మేరకు, నగరపాలక సంస్థ నివాస, వాణిజ్య వినియోగదారుల నుండి 'CLAP' వినియోగ రుసుములను వసూలు చేయడం లేదు. ఈ నిర్ణయం ప్రజలకు ఎంతో ప్రయోజనకరంగా ఉన్నప్పటికీ, దీనివల్ల నగరపాలక సంస్థపై ఏటా సుమారు రూ. 15 కోట్ల అదనపు ఆర్థిక భారం పడుతోంది. ఇది మా బడ్జెట్ సామర్థ్యాన్ని గణనీయంగా ప్రభావితం చేయడమే కాకుండా, రోజువారీ మున్సిపల్ పరిపాలన నిర్వహణపై తీవ్ర ఒత్తిడిని పెంచుతోంది.  ఈ ఆర్థిక ఇబ్బందుల కారణంగా, నగరపాలక సంస్థ తన అత్యవసర బాధ్యతలను నెరవేర్చడంలో తీవ్ర ఇబ్బందులను ఎదుర్కొంటోంది.  ముఖ్యంగా మున్సిపల్ సిబ్బంది, పారిశుధ్య కార్మికులకు జీతాల చెల్లింపు, వీధి దీపాలు, వాటర్ పంపింగ్ స్టేషన్లు , ఇతర ముఖ్యమైన మున్సిపల్ సేవలకు సంబంధించిన విద్యుత్ బిల్లుల చెల్లింపులు కష్టతరంగా మారాయి. 

 
ఈ పరిస్థితుల దృష్ట్యా, పెండింగ్‌లో ఉన్న స్టాంప్ డ్యూటీ వాటా, AMRUT నీటి సరఫరా పథకం కింద బ్యాలెన్స్ నిధులు, పెండింగ్‌లో ఉన్న BPS & LRS,  బిల్డింగ్ ప్లాన్ ఫీజు మొత్తాలను త్వరగా విడుదల చేయడానికి,  CLAP యూజర్ ఛార్జీలు వసూలు చేయకపోవడం వల్ల కలిగే ఆదాయ నష్టాన్ని భర్తీ చేయడానికి తగిన ఆర్థిక సహాయం అందించాలని పలుమార్లు ప్రభుత్వానికి విన్నవించారు. కానీ స్పందన రాకపోవడంతో  హైకోర్టులో మేయర్ పాకా సురేష్ పిటిషన్ వేశారు. నగర పాలక సంస్థ పాలకవర్గ ఆమోదం తెలిపిన తీర్మానాలను పొందుపరుస్తూ, హక్కుగా నగర పాలక సంస్థకు రావాల్సిన నిధులు మంజూరు చేసేలా ప్రభుత్వానికి ఆదేశాలు ఇవ్వాలని కోరుతూ కోర్టును ఆశ్రయించారు. 

హక్కుగా రావాల్సిన నిధులను ప్రభుత్వం ఇవ్వడం లేదు ... : 

నగర పాలక సంస్థకు హక్కుగా రావాల్సిన నిధులను కూడా ప్రభుత్వం ఇవ్వడం లేదు. చెత్త పన్ను రద్దుతో నగర పాలక సంస్థపై మరింత ఆర్ధిక భారం పడింది. నగర పాలక సంస్థకు స్టాంపు డ్యూటీ వాటా కింద నెలకు సుమారు రూ. 1.50 కోట్లు రావాల్సి ఉంది. కానీ  36 నెలల కాలానికి రాలేదు. ఈ మొత్తం కడప జిల్లా రిజిస్ట్రార్ కార్యాలయం నుండి ఇంకా అందాల్సి ఉంది. అందలేదు. అమృత్ నిధులు సకాలంలో విడుదల కాకపోవడంతో నిరంతర నీటి సరఫరా కార్యక్రమానికి ఇబ్బందులు ఎదురవుతున్నాయి. అంతేకాకుండా పెండింగ్‌లో ఉన్న BPS & LRS,  బిల్డింగ్ ప్లాన్ ఫీజు మొత్తాలను త్వరగా విడుదల చెయ్యాలని కోరిన ప్రభుత్వం స్పందించలేదు. అందువల్లే నగర పాలక సంస్థ పాలక వర్గం అమోదించిన తీర్మానాలను, హక్కుగా రావాల్సిన నిధులు త్వరితగతిన మంజూరు చేసేలా ఆదేశాలు ఇవ్వాలని హైకోర్టును ఆశ్రయించాం. త్వరలోనే నిధులు విడుదల అవుతాయని ఆశిస్తున్నాం. 

పాకా సురేష్, మేయర్, కడప నగర పాలక సంస్థ,